John 5

A Ka Zaho Gna Cei San Abyeda

1Ndeye avun, Yesu wa lo Urushelima ntu A Yahudiyi kunnu awyefan ɓo. 2N Urushelima mi nuwan zundna ho ɓo dna, n wu vi-vi n Akniabokunmiyi, ai yi kwo ge, Baitasda, kwo ɓei ashiragyi kpe zhi ngun atnu. 3Anyasan-yi ɓei zhi ɓo n mwa begye, awyebuayi, naʼzab-mazhiyi, na bwa-fifiyi dayi. Ɓai zhi ɓai pmi nuwan zundnahi kwa shan-shan. 4Ntu ge malaika Dagayi nya ɓei zhin woi ɓe nsa-sayi, wa bui nuwan zundna hi. Oza nwa kmi pita dna, n nuwanhi wa gwo kagna.

5Ozaho ɓei shi ɓo, n wo ɓei ku aye bwa shita-cei-nyimwa-nyimwa (38) shi nyasan ɓei ya wo. 6Sanu Yesu ɓei gye wo, wa ku kpe ge esa la mwa, shi nyasan ɓei yawo. Yesu wa nya wo ge, “Ho ye lo ha bwa lafiya?”

7Nyasan-yi wa ci wo ge, “Mi ye lo, ama mi to nzayi lo nwo ɓa bma mi zhin m. Shi mi ye lo ma lo dna, ma gye zado la lolo dna n ma bye.”

8Yesu wa ci wo ge, “Laka gni-agni Kmi ho apece ha lo api.”

9Nsai-sayi yi nyasan-yi wa laka sau, wa kmi pece wa lo api. Ama wyihi ɓei zhin satiwyi nu, A Yahudiyi nyipyeyi sun-sun yi. 10Ce to ɓo da a Yahudiyi atukwodam. Ɓa gna nyasan-yi ge, kwo zhin laifi nu, ha ku ho apece n naiye.

11Nyasan-yi wa ci ɓa ge Oza nwa ka mi gna nyi wo na gna mi ge mi ku.

12Ɓa nya wo ge, nyikana gna ho lo nuʼa?

13Ozaho to ɓei kpe Yesu yem, ntuge Wo ɓei la lu lo dna n begye. 14Nsado Yesu wa gye wo dna aduwa-nyakun, Wa gna wo ge, “Nsayi ho la lafiya bwa, to je laifi zhin shi ho ɓei shin zhin nyim. Kada enya nkwo du deye kwa bwa ho.”

15Ozaho wa lo a Yahudiyi atukwoda aba, wa gna ɓa ge, Yesu na ka wo gna.

16Ntu ce nu a Yahudiyi atukwoda ɓa ga Yesu wahala ge, wa ka ʼza gna n Satiwyi. 17Yesu wa ye wa gna ɓa ge, Omi Dada zhin Bemanayi n saho-sahoyi, Mi shan wo nu.

18Shi wo ɓei da lonu, kwa zhin a Yahudiyi atukwoda ɓa ye ɓa wu wo ge, wo ku laifi zhin, ntuge wa ka za gna n Satiwyi njesun woi la wohin tukwo ze dei-dei n Shekwoyi.

19Yesu wa gna ɓa ge, “Nugun ta mi wa zhin nyaho n wohin tukwom. 20Ntuge Dada ye n nugun yi, woi wu wo aɓo vinya n wo zhin, nugun kwa wo zhin aɓo wowoyi nmwa, ndu za kagna ye. 21Ngye shi Dada ku azafi kala wa ga ɓa wye-wyei nyi, Elonu Nugun ga aza wye-wyei n wo ye cei. 22Dada ta da ozaho-zahoyi owam, ama wo ku owada vinya fa fi n Nugun akun. 23Ntuge aza vinya ɓa ga Nugun mwa-mwa, ngye shi ɓa ga Dada. Nfye to ye fya ga Shekwoyi Nugun mwa-mwa n wa tnu mwoi nyim, agye fye ta ga Dada mwa-mwa lo n.

24“Ma gna fye gaiciya, oza n wa wo mi ɓeda wa ga Shekwoyi gaiciya wo ɓa bwa wye-wyei nyalo-nyalonya, ata da wo owam, ama wo la gmi n efi woilo wye-wyei mi. 25Ma gna fye gaiciya, esa ɓelo, ko nsaiye ma kwo la ɓe, nna aza fi-fiyi ɓa wo Shekwoyi Nugun begye, aza nɓa wo ɓa ɓa bwa wye-wyei. 26Ngye shi Dada n wye-wyei lo n wohin tukwo nyi, elonu wo la iko ga Nugun wa bwa wye-wyei n wohin tukwo ce. 27Wola iko ga wo ntuge wa da aza owa ntuge wo zhin oza Nugun nu. 28Ce to wo fyem, ntuge esa ɓelo, nu aza nɓa fi nna vingwo nyi ɓei wo Shekwoyi nugun begye, 29ɓa ɓei kun ɓe, aza nɓa ɓei ku ɓemanayi zhin, ɓa ɓei bwa wye-wyei, ama aɓenukwoyi zhinhi ɓa ɓei lo wada aba.

30“Mi ta da wa nmi gmanyi nu m, tile nu ma nya Dada ɓo kpa, nya ma wo, kwo nu n mi ɓa zhin. Mi ta da mihin ɓeda num, ama oza nwa tnu mi nyi.

31“Ndei ma zhin mihin tukwo saida, a gye gaiciya to dna lo n mi ɓedam. 32Oza do lo n wo zhin mi saida, mi-i kpe lo ge owo saida tu nmi tukwo zhin gaiciya nu. 33Fye ku tnu n azayi n Yohanna aba, woi ku saida zhin tu n gaiciya. 34Mi ta kpema zanyikwoci saida num, ama mi da lo nu ntuge fya pwo nu. 35Yohanna ɓo zhin fitila nu nfya ʼba, fya bwa agmada dna nwo buzangna nsayi fyewyi. 36Omi saida kwo du Yohanna nya lo. Atnu-tnu nmi zhin nyi ɓa ga saida ge Dada nu na tnu nmi yi. 37Dada nwa tnu n mi nyi, wo ga saida tu nmi tukwo. Fye to shin wo begye wom ai gna ge fye gye shi wo wu m. 38Owo ɓeda to dna lo nfye mim, ntuge fye ta ga oza gaiciya lo n Dada wa tnu n woi nyim. 39Fye zhin fya ba, Littafi Gyi-gyi-yi ntuge fye gye ge kwo ɓa ga fye wye-wyeyi. Littafi Gyi-gyi-yi da ɓeda tu nmi tukwo nu. 40Fyei ta ɓe mi aba lo, ntuge ma ga fye wye-wyei m.

41“Mi ta ye aza latu nu m. 42Mi kpe fye ye lo. Mi kpe lo ge Shekwoyi ye-ye to dna lo nyfe mi m. 43Ma ɓe dna nmi Dada ʼye, ama fye to gwo mim. Ama ndei ozado na ɓe dna n wohin ʼye to ge Dada wa tnu wom, fya gwo wo nu abwa ʼba-ba. 44Fye ta mi fya ga gaiciyam ntuge fye zan latu shin n aje aba, to fyei gye fye anuwan n latu yi nkwo gmi n Shekwoyi abam.

45“Ama fye to gye ge mi nu zhin fye kala n Dada abam, awo, Musa ɓeda nu nfye n na awyetu yi. 46Ndei fye ga Musa gaiciya, fye ɓa ga mi gaiciya ce, ntuge Musa ɓo ku nya ka tu nmi tukwo. 47Ama shi fye ta ga gaiciya lo, tu n nya tukwo n Musa ɓo ka nyim, fye ɓa ga mi ɓeda gaiciya nwuna?”